“मुलीसाठी नशा सोडून जगायचंय!”, वडिलांचा जिल्हाधिकाऱ्यांचा अर्ज अन् नशेचं सामान विकणाऱ्या मेडीकल्सचा भांडाफोड

४५ वर्षांचा एक व्यक्ती अनेक वर्षांपासून नशेच्या आहारी गेला होता. त्याला नशेची इतकी सवय लागली होती की तो नियमितपणे इंजेक्शन आणि विविध औषधांच्या माध्यमातून नशा करत होता.

Drug Addict Father Plea To Hapur DM Raid On Medical Stores: उत्तर प्रदेशातील हापूड जिल्ह्यात घडलेली एक घटना सध्या मोठ्या चर्चेत आहे. एका नशेच्या आहारी गेलेल्या वडिलांनी आपल्या छोट्या मुलीसाठी जगायचे आहे, अशी भावनिक विनंती जिल्हाधिकाऱ्यांकडे केली आणि त्या एका अर्जामुळे प्रशासनाने मोठी कारवाई केली. या प्रकरणात अनेक मेडिकल स्टोअर्सवर छापे टाकून नशेच्या औषधांचा साठा जप्त करण्यात आला आहे.

ही घटना हापूड जिल्ह्यातील गढ आणि सिंभावली परिसरातील आहे. सुमारे ४५ वर्षांचा एक व्यक्ती अनेक वर्षांपासून नशेच्या आहारी गेला होता. त्याला नशेची इतकी सवय लागली होती की तो नियमितपणे इंजेक्शन आणि विविध औषधांच्या माध्यमातून नशा करत होता. मात्र त्याच्या आयुष्यात एक टप्पा असा आला की त्याला आपले आयुष्य बदलण्याची तीव्र इच्छा झाली. त्यामागे कारण होते त्याची छोटी मुलगी. त्या व्यक्तीने जिल्हाधिकारी अभिषेक पांडेय यांच्या जनसुनावणीमध्ये हजेरी लावली. तो रिकाम्या हाताने आला नव्हता. त्याने आपल्या सोबत नशेसाठी वापरले जाणारे इंजेक्शन, औषधे आणि सिरिंज आणली होती. जिल्हाधिकाऱ्यांसमोर ही सर्व साधने ठेवून त्याने अत्यंत भावनिक शब्दांत आपली व्यथा मांडली.

तो म्हणाला, “साहेब, माझी एक लहान मुलगी आहे. मला मरायचे नाही. मला तिच्यासाठी जगायचे आहे. मी अनेक वर्षांपासून नशेच्या आहारी गेलो आहे. पण आता मला ही सवय सोडायची आहे. मात्र आमच्या परिसरात प्रत्येक गल्लीत मेडिकल स्टोअरमध्ये नशेचे इंजेक्शन सहज मिळतात. त्यामुळे नशा सोडणे खूप कठीण होत आहे. जर या इंजेक्शनची विक्री थांबवली नाही तर माझ्यासारखे अनेक तरुण नष्ट होतील.”

एका वडिलांची ही भावनिक हाक ऐकून जिल्हाधिकारी अभिषेक पांडेय यांनी तात्काळ या प्रकरणाची दखल घेतली. त्यांनी लगेचच पोलिस, महसूल आणि आरोग्य विभागाच्या अधिकाऱ्यांची सहा सदस्यांची विशेष टीम तयार करण्याचे आदेश दिले. या टीमला परिसरात नशेची औषधे बेकायदेशीरपणे विकली जात आहेत का, याची तपासणी करण्याचे काम देण्यात आले.

टीमने तपासासाठी एक वेगळी युक्ती वापरली. तक्रार करणाऱ्या त्या व्यक्तीलाच ग्राहक बनवून मेडिकल स्टोअर्समध्ये पाठवण्यात आले. त्याला नशेची औषधे मिळतात का, हे पाहण्याचा प्रयत्न करण्यात आला. काही मेडिकल स्टोअर्समध्ये गेल्यानंतर त्याला सहजपणे नशेची इंजेक्शने आणि औषधे मिळाली. यामुळे त्या दुकानांमध्ये बेकायदेशीर विक्री होत असल्याची खात्री प्रशासनाला मिळाली.

या माहितीच्या आधारावर प्रशासनाने तात्काळ छापेमारी सुरू केली. गढ आणि सिंभावली परिसरातील एकूण सात मेडिकल स्टोअर्सवर धाड टाकण्यात आली. या छापेमारीदरम्यान अनेक दुकांनांमध्ये नशेची औषधे खुलेआम विकली जात असल्याचे आढळून आले. काही ठिकाणी डॉक्टरांच्या प्रिस्क्रिप्शनशिवाय इंजेक्शन आणि औषधे विकली जात होती.

संबंधित बातम्या